കോഴിക്കോട് ടൌണ്‍ ഹാള്‍ .

എന്തെങ്കിലും പ്രോഗ്രാം കാണുകയാണെങ്കില്‍ മോനെ അത് ടൌണ്‍ ഹാള്ളീന്നു കാണണം ആ ഒരു സുഖം ലോകത്തെവിടെയും കിട്ടൂല ,ഇതിനു മുന്‍പും ചന്തു ടൌണ്‍ ഹാള്ളില്‍ പോയിട്ടുണ്ട് പക്ഷെ അന്നൊക്കെ പരമാവധി പത്തിരുപതു മുപ്പതു ആളുകളൊക്കെയെ അവിടെ ഉണ്ടായിരുന്നിട്ടുണ്ടായിരുന്നോളളു..ഇത്തവണ കോഴിക്കോടന്‍ നാടകൊത്സവമാണ് സകല നാട്ടുകാരും നാടക പ്രാന്ത് മൂത്ത് ടൌണ്‍ ഹാള്ളില്‍ തിങ്ങി നിറഞ്ഞിരിക്കുകയാണ് രണ്ടാഴ്ച്ച ഷേവ് ചെയ്യാതെ കാത്തു സൂക്ഷിച്ച ഞാന്‍ താടി എന്ന് വിളിക്കുന്ന ( ചില അസൂയക്കാര്‍ക്ക് ഇപ്പോഴും എന്റെ താടി നോക്കി അങ്ങനെ പറയാന്‍ പറ്റുന്നില്ലത്രേ ) സാധനം തടവിക്കൊണ്ട് ഹാള്ളിന്റെ മധ്യ ഭാഗത്ത് സീറ്റ് പിടിച്ചു .ഈ നാടകമൊക്കെ ഞാന്‍ കുറെ കണ്ടതാ പിന്നെ ഇവന്‍മാരിത് കുളമാക്കുന്നുണ്ടോ എന്ന് കണ്ടുപിടിക്കാന്‍ വന്നതാണ് എന്ന മട്ടില്‍ കുറച്ചു നേരമിരുന്നു..അല്പം കഴിഞ്ഞു നാടകം തുടങ്ങിയപ്പോഴാണ് വിധിയുടെ ക്രൂരത ഞാന്‍ മനസ്സിലാക്കിയത് , എനിക്ക് ഒന്നും കാണാന്‍ പറ്റുന്നില്ല , കാഴ്ചക്കുറവല്ല ഉയരക്കുറവാണ് വില്ലന്‍ . അഭിനേതാക്കളുടെ അരക്ക് മുകളില്‍ലുള്ള ഭാഗം മാത്രമേ കാണുന്നുള്ളൂ , വല്ല വിനയനും സംവിധാനം ചെയ്ത അത്ഭുതദ്വീപ്‌ പോലത്തെ നാടകമെങ്ങാനുമാണെങ്കില്‍ തീര്‍ന്നേനെ ..ആ പറഞ്ഞിട്ട് കാര്യമില്ല അച്ചന്റെയും  അമ്മയുടെയും  ഉയരം വച്ചു നോക്കുമ്പോള്‍  എന്റെ ഈ 154*  സെ.മി ഉയരം ഒരു വലിയ ഭാഗ്യമായിട്ടു കാണാനേ നിര്‍വാഹമൊളളു . 

കുറച്ച്ചുകൂടി കഴിഞ്ഞപ്പോള്‍ എനിക്ക് കാര്യങ്ങള്‍ കുറേക്കൂടി വ്യക്തമായി ,പ്രശ്നം എന്റേതല്ല ,എന്റെ പൂര്‍വ്വികരുടെതുമല്ല ,പെരുച്ച്ചാഴികളുടെതാണ് -നന്നായിട്ട് തുരക്കാനറിയാവുന്ന പെരുച്ചാഴികളുടെ, മുപ്പതു ലക്ഷത്തിനു ടൌണ്‍ ഹാള്‍ പെയ്ന്റ് അടിച്ചു മോഡി പിടിപ്പിച്ച തുരപ്പന്‍മാരാണ് എന്റെ അപ്പുറവും ഇപ്പുറവും ഇരുന്നു ഏന്തിവലിഞ്ഞു നോക്ക്ന്നവരുടെ കഴുത്ത് ഉളുക്കുകയാനെങ്കില്‍ അതിനു കാരണക്കാര്‍ . ടൌണ്‍ ഹാളില്‍ ഇടയ്ക്കിടയ്ക്ക് പ്രോഗ്രാമുകള്‍ ഉണ്ടാകുമെന്നും അതിനു സ്റ്റേജില്‍ ആള് കയറുമെന്നും അത് കാണാന്‍ നെറ്റിക്ക് താഴെ മൂക്കിനു ഇരുവശമായി കണ്ണ് എന്ന് പറയുന്ന  സാധനമുള്ള മനുഷ്യന്‍ എന്ന് പറയുന്ന ജീവികള്‍ കൂട്ടത്തോടെ എത്തുമെന്നും അറിയാത്ത ഏതെങ്കിലും പിണ്ണാക്ക് തിന്നുന്ന ആളായിരിക്കും ഈ ജോലി എടുത്തതെന്നും എടുപ്പിച്ച്ചതെന്നും വിശ്വസിച്ചുകൊണ്ട് അതിനു പിന്നില്‍ 'പ്രവര്‍ത്തിച്ച ' എല്ലാവര്‍ക്കും ആയുരാരോഗ്യ സൌഖ്യങ്ങള്‍ നേരുന്നു.